Showing posts with label காதல் கவிதை. Show all posts
Showing posts with label காதல் கவிதை. Show all posts

Thursday, June 18, 2015

பேஸ்புக்கில் காதலித்துப் பார்..!


பேஸ்புக் தோழியை கவர நினைப்பாய்
அவளறியாமல் காதல் வளர்ப்பாய்
*
பச்சை தான் பிடிக்கும் உனக்கு
பாழாய்ப்போன Pink-ம் பிடிக்குமென்பாய்
*
ஒரு நாய் கூட
உன் profile-ஐ எட்டிப் பார்க்காது
அவளது profile-ஐ
100 முறை பார்ப்பாய்...
*
அவளிடுவது லைக் தான் ஆயினும்
அதை லவ் என்றே புரிந்துகொள்வாய்
*
விதம் விதமாய் Sticker தேடுவாய்,
அன்பொழுக Status போடுவாய்
*
சரக்கடித்தது போல் சிலிப்பிய காலம் போய்
அபினடித்தது போல் அன்புதான் மெய் என்பாய்
*
தோழியின் தோழி
தோழி ஆவாள்
தோழியின் தோழன்
எதிரியாவான்
*
அவள் அள்ளித் தெளிக்கும் status மெசேஜில்
எழுத்துப் பிழைகள் பொறுப்பாய்
கருத்துப் பிழைகள் மறப்பாய்
*
‘தல’ வெறியானாய் நீயிருந்தும்
அவளுக்காய் மாறி மாறி
‘தளபதி’க்கு தாவிடுவாய்
*
காக்கா முட்டை கண் உனக்கு
அதில், காந்த சக்தி இருப்பதாய் நினைப்பாய்
கண்ணாடிக்கு வாய் இருந்தால்
காரித் துப்பியிருக்கும், தெரியாதுனக்கு
*
மோடியைப் போல் செல்ஃபிகள் தட்டுவாய்
ராகுலைப் போல் உளறிக் கொட்டுவாய்
*
மைக்கேல் டி குன்ஹா நீ
அவளுக்கு மட்டும் குமாரசாமியாவாய்
*
தமிழே ததிங்கிணத்தோம் உனக்கு
ஆங்கில quote ஆயிரம் போடுவாய்
*
முன்பகலில் ‘ஓ கே கண்மணி’யும்
பின்னிரவில் ‘மரியானும்’
காதில் வந்து காதல் பாய்ச்சுவார்கள்
*
அவள் போடும் ஸ்டேட்டஸ்களுக்கு
முதல் லைக் உனதாய் இருந்திட
அலெர்ட்டாய் இருப்பாய், தவறின் தவிப்பாய்.
*
இன்னொரு ஆண்மகன் முதல் லைக்கிட்டிருந்தால்
அவனது profile-லை அலசி ஆராய்வாய்
எதிரியின் எண்ணிக்கையில் ஒன்று கூடும்
எதற்கிவன் வந்தான் என மனம் வாடும்
*
லைக்கும், ஷேரும், கமெண்ட்டும் மட்டுமே
புத்தியில் புதைப்பாய், காதல் விதைப்பாய்
*
Awesome, Super, Cute மூன்றுமே
தாய்மொழி வார்த்தையாய் மாறியே போகும்
*
நோட்டிஃபிகேஷன் பீப் ஒலி உனக்கு
காதல் காலிங் பெல்லாய் கேட்கும்
*
பேஸ்புக் பார்த்திட தூக்கம் குறையும்
KB-யாய், MB-யாய், டேட்டா கரையும்
உனக்குள் இருக்கும் சே குவாரா
மிஸ்டர் பீனாய் மாறிடக் காண்பாய்
*
லவ்வா? என்றுன் தோழன் கேட்பான்
குலுக்கித் திறந்த கோக் போல
உள்ளே பொங்கும் உந்தன் காதல்..
‘இல்லை’ என்று சிரித்து மறைப்பாய்
மறுமுறை கேட்டால் சொல்ல நினைப்பாய்
*
பாழாய்ப் போன அந்த பன்னாடை
‘சரி மச்சி’ என்று சொல்லிச் சென்றிட
கடன்காரத் தோழனை மனதாரத் திட்டுவாய்
கெட்ட வார்த்தைகள் ஆயிரம் கொட்டுவாய்
*
யாரோ போடுவார் மொக்கை போட்டோ
அவள் லைக்கிட, உடனே லைக்குவாய்
அவள் பெயர் அருகில் உன் பெயர் வந்திட
பார்த்து ரசிப்பாய்.. சிரிப்பாய்.. சிலிர்ப்பாய்
*
ஒருநாள் இடியாய் ‘engaged’ என்று
அவளது Status வந்திடப் பதறுவாய்
*
கண்கள் இருளும், கைகள் உதறும்,
நாக்கு உலரும், மனசு கதறும்
*
கனவாயிருக்கக் கூடாதா என
பொய்யாய் மனசு ஏமாற ஏங்கும்
*
இது வேறு profile-லோ என்று
Refresh செய்தாலும்
ஃபேஸ்புக் சனியன் அவள் profileஐ தான்
மீண்டும் மீண்டும் காட்டித் தொலைக்கும்.
*
மருகுவாய், உருகுவாய், ஐஸ்வாட்டர் பருகுவாய்
லாக் அவுட் செய்வாய், லாக் இன் செய்வாய்
புலம்பலாய் உனக்கு பலநாள் கழியும்
*
Relationship-ல் Married என வர
அவள் உனக்கில்லை என்பது புரியும்
*
மாடியில் அலைவாய், பீச்சில் திரிவாய்
சோகம் கொண்டாடிட தாடி வளர்ப்பாய்
(அது கூட உன்னிஷ்டப்படி உடனே வளராது)
*
இப்படியே இன்னும் சிலநாள் போகும்
இது தான் நிரந்தரம் என்றே தோன்றும்
*
‘3’ படத்தின் பாடல்கள் மட்டுமே
எப்போதும் ரிப்பீட் மோடில் ஓடும்
*
புலம்பல் ஸ்டேட்டஸ் தினமும் போடுவாய்
மெல்லச் சாக வழிகளைத் தேடுவாய்
டாஸ்மாக், சிகரெட் இவைகளை நாடுவாய்
மேகி நூடுல்ஸ் கூட தின்னுவாய்!
*
உன் சோக ஸ்டேட்டஸ் பதிவுக்கு
புரியாமல் உன் புதுத் தோழி லைக்கிட,
நம்பிக்கை வளர்ப்பாய்
தாடியை மழிப்பாய்
*
மீண்டும் இன்னொரு காதல் துளிர்க்கும்
நெஞ்சில் காதல் பூவை வளர்க்கும்
*
புது வரம் தந்திடும் நம் பேஸ்புக்கு
தெய்வமாய் தோன்றுவான் மார்க் ஸக்கர்பர்கு !

Thursday, September 22, 2011

காதல் வசப்படும்.!


காலையில் சீக்கிரம் எழுந்து விடுகிறேன்
என்ன ஆச்சரியம் என்று
சந்தேகத்துடன் பார்க்கிறாள் என் அம்மா...


நான் பலமுறை தலை சீவுவதை
சந்தேகப்பட்டு பார்த்துவிட்டு செல்கிறார்
என் அப்பா...

என் ஆடை அழகேறியதில்
சந்தேகங்கள் ஊராருக்கு...


நான் எதை கிறுக்கினாலும்
கவிதை என்று சொல்லி விடுகிறார்கள்
நண்பர்கள் வட்டத்தில்...


இரவில் குரல் கொடுத்து

இன்னும் தூங்கவில்லையா என்கிறார் அம்மா
நான் தூங்குவதுபோல் நடிப்பது
தெரிந்துவிட்டது என்அம்மாவுக்கு...

அப்பா குரல் கொடுத்தும் கவனிக்காமல்

விட்டத்தை பார்த்துக் கொண்டிருக்கிறேன்
ஏதோ அசரீரி அழைத்ததாய் நினைத்து...

எதிர்படுபவர்களை கவனிக்க மறந்து
அதற்காக பலகாரணங்கள்
சொல்ல வேண்டியிருக்கிறது...


இமைகளை மூடினாலும் எட்டிப்பார்க்கிறது

கண்களுக்குள் இருக்கும் கனவுகள்...

கவிதைவீதி
நடை, உடை, பாவனை மாறிவிட்டது
இருந்தும் மாறாதது போல்
நடிக்க வேண்டியிருக்கிறது...

இனி என்ன செய்ய...
எவ்வளவு மறைத்தும் மறைக்கமுடியவில்லை

எனக்குள் வந்துவிட்ட காதலை....

Tuesday, February 1, 2011

காதல் கவிதை : நினைவெல்லாம் நீயாக!



கவிதை எழுத நினைத்தேன்
நினைவுக்கு வந்தாய் நீ
என் பேனா எழுத மறுத்தது
கவிதைக்கே கவியா? - என்று

பேச நினைத்தேன்
என் உதடுகள் உச்சரித்தது
உன் பெயர் மட்டுமே
என் மனம் சொன்னது
நல்ல கவிதை - என்று 

இசையை இரசிக்கலாம்
என்று நினைத்தால்
என் இதயம் என்னது
நீ பேசும் மொழியே
நான் கேட்க விரும்பும்
ஏழிசை கீதம் - என்று

கண்ணாடி பார்த்தேன்
அதிலும் விம்பங்களாக
உன் உருவம் மட்டுமே
என் கண்களுக்கு புலபடுகிறது

உண்ண அமர்ந்தேன்
நீ பரிமாறாத உணவு
உண்ண பிடிக்கவில்லை எனக்கு
அந்த உணவு கூட கசக்குது எனக்கு

தூங்க வந்தேன்
நீ இல்லாமல்
பஞ்சு மெத்தை கூட
கருங் கற்கள் ஆனதடி எனக்கு

எனக்குளே ஆயிரம் கவிதைகள்
நீ மட்டும்  எழுதபடாத கவிதையாக
நிஜமான நிஜங்களாக
நினைவெல்லாம் நீயாக!

Wednesday, December 1, 2010

காதல் கவிதை - தனிமையில் உன்னினைவோடு


உயிர் மெய் எழுத்துகளை உருக்கி
மெய் நீ எந்தன் உயிர் என்று
செதுக்கி, கோர்த்து, கட்டுகிறேன்
பண்மாலை இங்கு!

சித்தத்தில் கலந்தாய்!
நித்தம் நித்தம் எந்தன்
நினைவுக்குள் நுழைந்தாய்!
வித்தகனாய்  என்னை
விதவித கவிபடைக்க ஆணையிட்டாய்...

கற்றவர்கள் எழுதிவைத்த புத்தகத்தில் காணாதின்பம்
சுட்டுவிழி சுடரோளியே
உந்தன் சொல்லழகில் கண்டேன் பெண்ணே!

ரம்பையாம் ஊர்வசியாம்
இவ்மூலோகத்து பேரழகியாம்
உன்னை கண்டபின்னே இவ்வழகிகள்
இங்கு தேவையில்லை பெண்ணே!!

அழகு என்றால் நீயே என்று கூறமாட்டேன்
எனக்கு அழகு நீதான் என்று
எச்சபையிலும் அடித்து கூறமறக்க மாட்டேன்!!!

என் அழகே நீ இங்கு
என் நினைப்பு வந்ததென்று
மணியடித்து கூற இங்கு என்
மனதுக்குள் பேரின்பம்
நினைவுக்குள் உன் உருவம்
கண்ணுக்குள் பல கவி வடிவம்
இக்கருணை வேண்டும் எனக்கு இங்கு என்றென்றும்!!!!!!

சொல்லடுக்கி சொல்லப்போனால்
சொல்லிக்கொண்டே இருப்பேன் இங்கு நான்
எந்தன் காதலை உன்னிடம்
நாளைக்கும் சொல்ல வேண்டும்
ஆகையால் இன்று இங்கு
முற்று வைப்போம் என் செல்லமே!!!!!!!!!